Publitzade sotziale in sardu

Custu blog cheret èssere finas una casta de diàriu de su master de comunicatzione e interpretariadu in limba sarda chi bos apo contadu carchi die a como. Comunicare oe in sardu si podet e duncas pro dare visibilidade a sa limba est cumintzada una campanna de Publitzidade sotziale in sardu. Una publitzidade chi duncas non bendet perunu produtu ma punnat a promòvere Entidades culturale e sotziales de voluntariadu e sena finalidades de lucru. Sas primas locandinas sunt istadas istampadas in milli còpias cadauna e como sunt prontas pro las difùndere e las apigare in entes, iscolas istitutziones. Custa casta de publitzidade at isseberadu organizatziones internatzionales che a Intervita, assòtziu chi punnat a megiorare sas cunditziones de sos prus pòveros de su mundu, e che Selvas chi si òcupat in particulare de sos problemas de sa regione andina e de s'Amèrica latina. Paris cun custa casta de documentos chi dant boghe a organismos sotziales, b'at a àere totu una sèrie de publitzidades e decàlogos chi pertocant sa salude, sa prima est intitulada Pro imbetzare bene. 35 règulas pro una bida sana e longa.