In sas dies coladas su paba at presentadu a unu grupu de cardinales su Motu Propriu in ue resùscitat sa missa in latinu a rechesta de sos fideles. S’antiga tzelebratzione litùrgica codificada dae paba Pio V (1566-1578), rennovada in parte dae Giovanni XXIII nel 1962 e abolida in manera definitiva in su 1969 dae Paolo VI. Duncas Beneitu XVI at a cunsentire a chie nde at a fàghere rechesta (nessi 30 pessones) de sighire s’antigu ritu sena su placet de sos pìscamos, una missa reztitada tota in latinu, francu s’omelia semper pronuntziada in sas limbas natzionales, cun sos tzelebrantes bestidos cun sa pianeta clàssica imbetzes de sa casula, fache a su tabernàculu cara a s’Oriente e palas a sos fideles, sena letores làicos de sos passos bìblicos, sos cherichetos semper in ghenugru, cun gestualidades e ritos litùrgicos (beneditziones, genuflessiones, aspersiones) ritènnidos oramai superados.In custa manera su paba isperat de pòdere recuperare sos sustenidores de Marcel Lefebvre iscomunicadu in 1988 ca aiat ordinadu 4 piscamos sena su placet papale.
In unu mundu chi est in chirca de recuperare sas limbas natzionales faghet ispantu chi sa Crèsia chirchet de reintroduire una limba chi non s'imparat prus mancu in sos litzeos. Mi paret duncas chi amus a torrare a intèndere carchi tzia narende imbetzes de "prospicio me in faciam tuam" "sporcizia mea in faccia tua".
